HISTORIKU I SHKOLLËS
Arsimi fillor në fshatin Sellcë të Tetovës ka një histori relativisht të gjatë në edukimin dhe arsimimin e brezave të rinj. Të dhënat tregojnë se shkollimi katërvjeçar ka filluar në periudhën mes Dy Luftërave Botërore, por mësimi është zhvilluar në gjuhën serbe nga mësues serbë, ndonëse gjuha amtare e nxënësve ishte shqipja. Objekti i parë shkollor ndodhej në vendin ku sot gjendet xhamia e fshatit.
Pas Luftës së Dytë Botërore (1945), si në shumë vende të tjera, edhe në Sellcë u hap shkolla e parë me mësim në gjuhën amtare (shqipe), duke ofruar jo vetëm arsim fillor të rregullt, por edhe kurse kundër analfabetizmit. Gjenerata e parë e nxënësve filloi shkollimin në vitet 1945-1946 me 54 nxënës meshkuj të organizuar në klasën e parë dhe të dytë së bashku, ndërsa vajzat u pranuan për herë të parë në vitin shkollor 1947-1948, me gjithsej 12 nxënëse. Mësuesit e parë të shkollës ishin Femi Selami nga Reçica e Madhe, Hamdi Selmani dhe Hysni Halimi të dy nga fshati Gajre.
Kontribut të madh dhanë edhe mësuesit Behadin Sulejmani dhe Zeqir Memeti, të cilët, pasi përfunduan Normalen në Shkup (1948-1950), u kthyen për të kontribuar fillimisht në disa fshatra të tjerë dhe më pas në fshatin e tyre të lindjes, në Sellcë, mu në kohën kur në shkollat tona të këtyre anëve mungonin mësuesit, e në veçanti mësuesit vendas.
Gjatë viteve 1952-1954 u ndërtua shkolla e re dhe nxënësit menjëherë kaluan në objektin e sapopërfunduar, ku edhe sot vazhdon të zhvillohet mësimi.
Që nga fillimi i punës e deri më vitin 1964 kjo shkollë ka qenë katërvjeçare, kurse që nga viti shkollor 1964 – 1965 bëhet shkollë tetëvjeçare. Poashtu, që nga themelimi e deri më vitin 1968 ka mbajtur emrin e atdhetarit dibran Hoxhë Voka dhe nga ky vit e deri më vitin 1985 ka mbajtur emrin “Rilindja”. Përsëri që nga viti 1985 e deri më vitin 1994 i ndërrohet emri në “19 Noemvri”. Dhe së fundi, më vitin 1994 shkollës iu rikthye emri “Rilindja”.
Gjatë gjithë kësaj periudhe kjo shkollë ka pasur sukseset dhe ngecjet e veta, varësisht nga rrethanat shoqëroro – politike nëpër të cilat ka kaluar ajo.
Deri më vitin1985 ka funksionuar si shkollë periferike në kuadër të shkollës fillore “Liria” të qytetit të Tetovës. Me ndarjen e saj si shkollë e veçantë qendrore (1985), në kuadër të saj do të përfshihen edhe dy shkolla të tjera periferike, ajo fshatit Vicë dhe ajo e fshatit Llacë.
Sot, shkolla fillore "Rilindja" përballon sfida të ndryshme për shkak të objektit të vjetër, i cili e vështirëson procesin mësimor. Ndërtimi i një shkolle të re ka filluar para 24 vitesh, por ende nuk ka përfunduar.
Pavarësisht sfidave, shkolla "Rilindja" mbetet një institucion me një traditë të pasur dhe një qendër e rëndësishme e dijes dhe edukimit në fshatin Sellcë. Shpresohet që ndërtesa e re të përfundojë së shpejti, duke ofruar kushte më të mira për brezat e ardhshëm.
Një pasqyrë e shkurtër e organizimit të punës edukative-arsimore në shkollën fillore “Rilindja” të fshatit Sellcë sot
Aktualisht, në vitin shkollor 2024 – 2025, në të tri shkollat (atë qendrore në Sellcë dhe atyre periferike në Llacë dhe në Vicë) mësimin e ndjekin gjithsej 383 nxënës (174 meshkuj dhe 209 femra). Mësimin e realizojnë gjithsej 54 arsimtarë së bashku me shërbimin dhe bashkëpunëtorët profesionalë, si dhe 6 punëtorë të tjerë teknikë që kujdesen për mirëmbatjen e objekteve të shkollave.
Ekipin drejtues (menaxhues) të shkollës e përbëjnë: drejtori, ndihmësdrejtori dhe sekretari i shkollës. Ndërsa nga bashkëpunëtorët profesionalë: pedagogu dhe psikologu i shkollës. Në ndihmë të procesit edukativo-arsimor funksionon edhe biblioteka e shkollës.
Për mirëmbajten teknike dhe higjienike të objekteve të shkollës përkujdesen katër punëtorë në shkollën qendrore në Sellcë, dy në shkollën e fshatit Vicë dhe një në shkollën e fshatit Llacë.
Mësimi realizohet në gjuhën shqipe dhe sipas planit dhe programit mësimor për arsim fillor nëntëvjeçar të Ministrisë së Arsimit dhe Shkencës të Republikës së Maqedonisë së Veriut. Në pajtim me planin dhe programin mësimor në shkollë organizohen edhe aktivitete të lira shkollore, gara shkollore, me çka stimulohet zhvillimi kulturor e sportiv i nxënësve.
Në bashkëpunim me shërbimin shëndetësor lokal gjatë tërë vitit shkollor kujdes i veçantë i kushtohet edhe shëndetit dhe sigurisë së nxënësve nëpërmjet organizimit të punëtorive dhe të ligjëratave me karakter edukues për nxënësit dhe prindërit e tyre.
Shkolla fillore "Rilindja" bashkëpunon me pushtetin lokal dhe me institucionet qendrore të arsimit për realizim sa më kualitatv të mësimit dhe aktiviteteve të planifikuara për të siguruar një arsim cilësor dhe kushte më të mira për nxënësit e saj.
Mujdin Sulejmani, arsimtar i gjuhës shqipe